• ekonomskaalibunar@gmail.com etsalibunar@madnet.rs
• 013/641-036
• ekonomskaalibunar.wordpress.com/

Рок снованя: 1964.

Снователь: Локална самоуправа

Файта установи: Фахово школи

Язик воспитно-образовней роботи: Сербски, Румунски

О установи

Шицко почало 1964. року.

У тот час општина Алибунар доживйовала привредну експанзию, та ше худобна и нєадекватна квалификацйна структура роботнїкох наруцовала як вельки проблем. Обачлїво ше чувствовал нєдостаток роботнїкох зоз закончену штредню школу економского унапряменя, бо теди на териториї општини Алибунар нє постояла анї єдна штредньошколска установа.

Школа, з одлуку СО Алибунар почала з роботу 27. марца 1964. року у адаптованих просторийох старей карчми «Дрина» у Улїци братства и єдинства 25. Того дня до алибунарскей штреднєй школи по перши раз крочели 75 дзивчата и хлапци, подзелєни до двох оддзелєньох.

На розполагованю им були два учальнї, єден дактилокабинет, зборнїца и два канцелариї: за директора и секретара.

Нєшка школа роби у будинку на поверх хтори збудовани 1966. року на 3.657 квадратних метерох од чого 2.350 метери заварти просториї и 1.307 метери парки, спортски терени и тротоари.

У нукашньосци школи постоя 35 векши и менши просториї. Од тих просторийох 16 учальнї то и специялизовани кабинети, простория за новинарску секцию и интернет, библиотека зоз читальню, сала за физкултуру з одвоєнима зоблєкальнями за хлопох и дзивки, ресторан зоз кухню за потреби школярох погосцительного напряму, оглядна предавальня (кабинет за тарґовцох), зборнїца, канцелария за директора и секретара, за педаґоґа, простория за помоцни персонал, шопа за алат итд.

На отвореним єст терен за рукомет и мали фодбал хтори ма и закриту трибину капацитету 1000 места и надкрити театер вигодни за концерти.

Терени маю инсталовани рефлектори та их мож хасновац и вноци.
Прилагодзованє школи ґу потребом штредку.

Под час крутей и централизованей орґанизациї школа указала вельку, за тот час нєобичну флексибилносц, та ше схопно прилагодзовала тедишнїм потребом привреди и штредку.

Дзешец роки после снованя школи (1974/75.) уведзена настава на румунским язику. То було значне дїло демократизациї, толеранциї и ровноправносци народох и народносцох тедишнєй держави.

Провадзаци потреби локалней привреди 1988. року оформене оддзелєнє тарґовцох, а 1999/2000. року уписане и перше оддзелєнє погосцительного напряму хторе мало за циль школовац кадри келнерского и кухарского образовного профилу.

На таки способ школа указала високи ступень флексибилносци як одвит на моментални потреби окруженя, цо ище баржей оправдовало постоянє єдней такей установи.

За потедишнї просперитет школи найвекши заслуги припадаю тедишньому директорови Душанови Жули, хтори з того роботного места 2001. року пошол до пензиї, после 37 рокох директорского стажу.

ФАХОВИ ПРОФИЛ И ОПРЕМЕНОСЦ ШКОЛИ:

У школи нєшка заняти 60 роботнїки од хторих 47 зоз факултетску диплому.

Просекова длужина роботного стажу у школи ґарантує искуство и квалитет кадрох. Школа ше намага участвовац у шицких проєктох хтори ше занїмаю з унапредзованьом настави. Наставнїки участвую у роботи з матичнима фаховима дружтами и радами, дїловнима заєднїцами и заєднїцами школох.

Просторни условия (учальнї, кабинети, библиотека, интернет-кабинет, провадзаци просториї, двор, школски ресторан…) опрема и мебель одвитую нормативом и адекватно ше их отримує. Праве ше тих дньох (новембер 2006. року) закончує найвекша инвестиция од вибудови школи: меня ше вкупну дотирвалу древени столарию з алуминийову.

Сала за физкултуру у самим проєкту мала нєадекватни димензиї, алє ше тот проблем ришує з вибудову городскей спортскей сали хтору ше будує у нєпостредней околини.

Од наставних средствох школа ма 49 компютери, копир-апарат, авдио-визуални апарати, опрему за школски ресторан, били табли…

СЕКЦИЇ И НАЙВЕКШИ УСПИХИ ШКОЛИ, ШКОЛЯРОХ, НАСТАВНЇКОХ:

Школа понука звонканаставни активносци на инициятиву школярох. Успих хтори посцигую поєдинєчно – школяре або тими третирує ше и як успих школи.

Од секцийох найактивнєйша новинарска секция. Коло нєй школяре анґажовани звонка настави у велїх спортских активносцох.

ЗНАЧНИ ПРОЄКТИ И АКЦИЇ:

Сама школа порядно орґанизує акцию добродзечного даваня креви, систематични и санитарни препатрунки за шицких школярох и занятих.
Простори у школи оплеменєни з квецом, як у парку опрез школи, так и у самим голу будинку. Пестує ше одвичательне одношенє занятих и школярох спрам ушореня просторийох школи и єй околини. У ушореню просторийох, окреме учальньох окремну учасц маю сами школяре зоз своїма идеями и роботами.

Основни и окремни ознаки школи то: амблем, моноґрафия, школски новини, а интернет-презентацию ше вирабя. У школи ше порядно и часто отримує рижни манифестациї: програми, квизи, трибини, вистави, спортски активносци, а барз части и заєднїцки полудзенки занятих пиятками, бо у школи постої ресторан за обуку школярох, цо обачлїво позитивно уплївує на компактносц колективу и медзилюдски одношеня.

СОТРУДНЇЦТВО ЗОЗ ДРУГИМА ШКОЛАМИ, ГОРОДАМИ И ИНСТИТУЦИЯМИ:

Школа сотрудзує зоз зроднима установами у найузшим и ширшим окруженю, а ма и окремни приятельски одношеня з Универзитетом «Васил Ґолдиш» з Араду, як и зоз штреднїма школами зоз Вишеґраду и Фочи. Школа активно участвує прейґ своїх занятих и школярох у орґанизациї скоро шицких општинских активносцох яки вязани за еколоґию, културу, забаву, спорт и гуманитарни акциї.

Директор: Дарко Чекеревац

Датум ступаня на длужносц: 01.07.2025