Образованє у АП Войводини ма длугоку традицию. Образовна система Републики Сербиї нєшка барз розвита и облапя предшколски установи, основне, штреднє, високошколске образованє як и последипломски и докторски студиї. Школство у АП Войводини часц тей єдинственей образовней системи у Републики Сербиї.

Предшколске воспитанє и образованє (ПВО) ма важни уплїв на розвой дзецка и представя основу за познєйши успих у живоце за дальше образованє, добробут, обезпечованє роботи и социялне уключованє. Зоз Законом о основох системи образованя и воспитаня («Службени глашнїк РС», число 88/17 и 27/18 – др. закон), ушорени основи системи предшколского воспитаня и образованя, основного и штреднього образованя и воспитаня и образованя одроснутих, а зоз Законом о предшколским воспитаню и образованю («Службени глашнїк РС», число 18/2010, 101/2017, 113/2017 – др. закон, 95/2018 – др. закон и 10/2019) ушорена обласц предшколского воспитаня и образованя як часц єдинственей системи образованя и воспитаня.

Як часц обовязного образованя и воспитаня хторе тирва дзевец роки, починаюци од школского 2006/2007. року, родичи длужни уписац дзецко до предшколскей установи, пре нащиву обовязней пририхтуюцей предшколскей програми хтора тирва штири годзини на дзень, найменєй дзевец мешаци.

Воспитно-образовну роботу у предшколских установох ше реализує на сербским, мадярским, словацким, румунским, руским и горватским язику, алє и двоязично, у национално мишаних штредкох, як и на странских язикох, у АП Войводини на вкупно осем язикох. Дїялносц предшколского воспитаня и образованя ше окончує у предшколскей установи, а винїмково и у школи, у складзе зоз законом.

Основне образованє у АП Войводини обовязне и безплатне. Наставни плани и програми структуровани так же би школяре достали широке обще образованє. Поєдинєчни интересованя ше стимулує з додатну наставу и роботу у секцийох, а за школярох хтори маю слабши успих – орґанизує ше дополнююцу наставу. Окремну увагу ше пошвецує образованю дзецох зоз завадзанями у розвою и инвалидитетом. На териториї АП Войводини єст 13 основни школи за школярох зоз завадзанями у розвою и инвалидитетом. Тиж, 30 рядово основни школи маю оддзелєня за їх образованє, а у шицких основних школох иснує можлївосц и за инклузивне образованє. У АП Войводини роби 21 музична школа и два балетски школи. У Новим Садзе и Зомборе робя школи за образованє и воспитанє одроснутих, а оддзелєня за тоти потреби єст и у 18 рядових основних школох.

Наставу, на шицких уровньох образованя у Сербиї, ше трима на сербским язику, а можлїве, под одредзенима условиями, и на язику националних меншинох. Тоту законску можлївосц ше часто хаснує у АП Войводини пре виражену мултиетнїчну структуру жительства. За шицких школярох цо ше нє школую на мацеринским язику оможлївене и пестованє мацеринского язика з елементами националней култури. У основних школох на териториї АП Войводини, попри настави на сербским язику, наставу ше трима на ище пейцох язикох (мадярски, словацки, румунски, руски и горватски). Попри рядовей настави на спомнутих язикох, школяром оможлївене и виучованє мадярского, словацкого, румунского, руского и горватского язика, и ище шейсц язики (українски, бунєвацки, ромски, болгарски, македонски и чески), цо вкупно єденац язики у рамикох виборней настави – Мацерински язик / бешеда з елементами националней култури.

По основним образованю, младим у АП Войводини на розполаганю ґимназиї, фахово школи, мишани школи, штреднї уметнїцки школи и штреднї школи за образованє школярох зоз завадзанями у розвою и инвалидитетом. У рамикох рядового штреднього образованя, наставу ше трима на сербским, мадярским, словацким, румунским, руским и горватским язику.

На териториї АП Войводини єст и 55 приватни предшколски установи и 32 приватни основни и штреднї школи за хтори Покраїнски секретарият за образованє, предписаня, управу и национални меншини – национални заєднїци утвердзел же виполнюю условия у поглядзе простору, опреми, наставних средствох и потребного числа наставнїкох, як и фахових сотруднїкох за початок роботи и окончованє дїялносци штреднього образованя и воспитаня.